Коом Мэрия: Бишкектин борборунда экологияга зыянсыз автобустар гана каттайт

Мэрия: Бишкектин борборунда экологияга зыянсыз автобустар гана каттайт

Бишкек шаарынын борбордук бөлүктөрүндө экологияга коопсуз гана коомдук транспорттор каттайт. Бул тууралуу мэриядан билдиришти. 

Маалыматка караганда, бул боюнча алгачкы кадамдар жасалды. Июнь айында Өзбекстанда өндүрүлгөн ISUZU үлгүсүндөгү 50 автобус ишке киришти. 

“Келишимдин негизинде жакынкы күндөрү дагы 40 автобус келет. Бирок алар газ менен иштечү автоунаалар. 2023-жылга чейин 1 миңге чукул газ моторлуу транспорт киргизебиз. Эмдиги жылы азыркылардан дагы көп орундуу 30 автобус алып келинет. Анда майыптар үчүн ыңгайлуу шарттар каралган”, — деп айтылат билдирүүдө. 

Мэриядан кошумчалашкандай, учурда шаар жетекчилиги эл аралык донорлор менен бир нече долбоорду ишке ашырууну көздөөдө. Мисалы, Европа реконcтрукциялоо жана өнүктүрүү банкы менен “Бишкек шаарынын муниципалдык коомдук транспорт системасын жакшыртуу” долбоорун ишке ашыруу пландалып жатат. 

Ал эми Азия өнүктүрүү банкы аркылуу “Шаардык транспортту электрлештирүү” долбоору ишке ашат.